Mi estas nun en laborvizito al Vladikavkaz, mia naskiĝloko.
En la fora 1995a jaro mi finis mezlernejon kaj gajnis la lokan sendependan (do, ekster la kleriga ministerio) konkurson «Plej bona lernejfininto». Tia konkurso okazis tiam la unuan fojon, kaj ĉi-jare ĝiaj organizantoj el fondaĵo «Kredo-Znanija» invitis min al la solenaĵoj. Ĉar mi volis esti iom pli utila ol nur ornamaĵo de la festo, mi proponis ankaŭ fari seminarion pri oseta Vikipedio.
Rezulte ekde la pasinta vendredo mi estas ĉi tie.
Vendrede, preskaŭ tuj post la aerbusa veno, mi estis brodkastita de la loka televido kun 10-minuta programero pri Vikipedio kaj la lingvo ĝenerale. Mi estis absolute malpreta, sed onidire aspektis sufiĉe bone:
Sabate matene okazis la solenaĵo pri la plej bonaj lernejfinintoj (gajnintoj de la konkurso) en la kontruaĵo de urbestraro. La dek elektitaj gajnintoj ĉiujare ricevas signifajn (por lernejano) monpremiojn. Ili estas ne la homoj, kiujn kutime elstarigas lernejo, ĉar ili ofte ne havas plej altajn notojn en ajna de la studobjektoj: sed pro la sumigo de poentoj por diversaj studobjektoj dum la konkurso, gajnas tiuj, kiuj interesiĝas pri ĉiuj studobjektoj, estas ĝenerale kleraj. Mi havis la eblecon alparoli la gajnintojn.
En mia parolado mi dankis la organizantojn kaj aparte la aŭtorojn de la taskoj (ili, almenaŭ en mia jaro, estas tre interesaj). Al la gajnintoj mi, por ne esti banala deziranto de feliĉo, konsilis iĝi amikoj kaj gardi la kontaktojn, kiuj poste povas iĝi plej agrablaj kaj utilaj en la vivo. Mi planis per tio fini, sed s-ro Dzgojev, la estro de la fondaĵo «Kredo-Znanija» (organizinta la konkurson) invitis min rakonti ankaŭ pri miaj aktivaĵoj rilate la osetan lingvon. Tiel mi povis, en ĉeesto de la respublikaj altranguloj, ĵurnalistoj kaj, plej grave, plej bonaj lernantoj rakonti pri Vikipedio en la oseta lingvo, pri ĝiaj jamaj atingoj kaj pri la eblecoj partopreni en la projekto.
Ankaŭ tie, en la urbestraro, reprezentantoj de «Kredo-Znanija» rakontis, kiel aspektos mia seminario. Fakte temas pri tri: lunde mi prelegas je la tria, marde — je la dua kaj la kvara. Aldone al tio, mi renkontis en la solenaĵo mian iaman instruistinon de la rusa lingvo kaj literaturo, kiu intertempe iĝis direktoro de mia lernejo (unu el la plej fortaj en Nord-Osetio), kaj ni interkonsentis, ke ankaŭ en tiu lernejo mi prelegos lunde, la 23-an (dematene).
Aspektas kiel tre densa programo de vizito :) Malgraŭ tio, mi havis liberan dimanĉon: kaj uzis ĝin por viziti mian bonan amikon Soslan-on.
Kvankam mi ankoraŭ ne uzis ilin, tamen mi dankas s-ron Yves Nevelsteen pro la studmaterialoj, kiujn li afable permesis reuzi. Lia ppt-prezento de Esperanta Vikipedio estis tre bona malneto por ke mi refaru ĝin kaj havu kiel plano de prezentadoj ĉi tie.